KLASEAK
Akroyoga yoga, akrobaziak eta thailandiar masajea uztartzen dituen diziplina da.
BALEAn 3 maila desberdin ditugu:
AKROYOGA 0: Akroyogaren oinarriak poliki poliki ikasteko 3 hilabeteko modulu bat da. Akroyoga inoiz egin ez eta praktikatzen hasi nahi duten pertsonentzat pentsatuta dago.
*Behin hiru hilabeteak hasita, ez da izen ematerik onartuko.
AKROYOGA 1: Maila anitzeko akroyoga klaseak, akroyoga noizbait egin eta ikasten jarraitu nahi dutenentzat. Klase hauetara etorri ahal izateko ezagutza maila minimo bat izan behar dute.
AKROYOGA 2: Akroyoga denbora bat praktikatzen daramaten pertsonetzat eta oinarriak oso egonkor dituztenentzat. Maila honetan, hilabete inguru irauten duten moduluka egiten dugu lan. Moduluen gaiak orokorrak izan daitezke flow, slackro, pops, icarians, standing edo dance lifts bezala, edo zehatzatgoak hand to hand edo foot to hand bezala.
Yoga mugimenduan, arnasketaren erritmoan jariatuz. Hainbat asana (postura) konbinatzen dituen praktika dinamikoa da, pertsona bakoitzaren arnasketa-erritmoari lotutako mugimendu jariakorraren bidez.
Yoga oso fisiko bat denez, gorputza tonifikatzen eta malgutasuna lortzen lagunduko dizu. Gainera, koordinazioan, orekan eta kontzentrazioan hobekuntzak nabarituko dituzu.
Beharbada saio batean Vallek Ashtanga yoga praktika bat gidatuko digu.
Irakaslea: Valle.
Yoga mota estatikoagoa energia aktiboenaren eta erlaxazioaren arteko oreka bilatzean oinarritzen da, baina ez du zertan horregatik intentsitate gutxiagoko praktika izan.
Yoga inoiz egin ez duten edo hasi berri diren pertsonentzat oso egokia da; izan ere, arreta handia jartzen da gorputz-lerrokaduran jarrera bakoitza arnasketa batzuk mantenduz. Horrek jarrera bakoitza pixkanaka integratzen laguntzen du.
Hatha yogak zure egoera fisikoa hobetzen ere lagunduko dizu, zure osasun mentala hobetzeaz gain, antsietatea, estresa eta nekea gutxituz.
Irakasleak: Marta eta Maria.
Klase hau yin yogaren eta yoga errestauratiboaren arteko fusioa da. Bertan, burua eta gorputza lasaitzen saiatzen gara, yoga-jarrera pasiboen eta luzapen luzeen bidez.
Yin yogan gorputza eta burua oso maila sakonean lantzen dira. Jarrerak 2 eta 5 minutu bitartean mantentzen dira, osagarrien laguntzaz, eta luzaketak ehunen geruza sakonenetara iristen dira. Horrek erlaxazio sakoneko egoera bat dakar, beharrezkoak ez diren tentsioak askatuz.
Klase hau perfektua da eguneroko ohiturek sortzen diguten antsietatea eta estresa askatu nahi dutenentzat.
Irakaslea: Valle.
65 urtetik gorako pertsonen beharretara egokitutako yoga.
Klase honetan Vallek yoga estilo ezberdinen fusioa erabiliko du ikasgelako ikasleentzat egokitu eta denentzat eskuragarri izateko. Aktibazio-uneak eta erlaxazio osoko uneak izango ditu.
Klase honek indarra, malgutasuna, koordinazioa, kontzentrazioa eta oreka lortzen lagunduko dizu, eta, aldi berean, erlaxatzen ikasteko teknikak emango dizkizu.
Irakaslea: Valle.
Diziplina honek dantza eta akrobazia uztartzen ditu eta publiko guztientzat eskuragarri egiten du. Zatoz gorputza dibertitzen zaren bitartean mugitzera!
Klaseak Movement Flow diziplinaren barruko mugimenduak ikastean zentratzen dira, gero flow izeneko koreografia txiki batzuk sortzeko (musikarekin edo gabe).
Pertsona bakoitzak bere mailan duen gorputza eta eman diezaiokegun mugimendua aztertzen saiatzen da. Beti jolasa eta esplorazioa oinarri hartuta.
Irakaslea: Maialen.
Bertikalak eta alderantzikatuak. Mundua buruz behera landuko dugu klase hauetan. Gorputza prestatuko dugu “pinuan” egoteko gai izan dadin, buruarekin eta bururik gabe.
Bertikalak diziplina gogorra da, baina denbora eta dedikazioarekin oso gogobetegarriak izan daitezke. Zure gorputz osoa zure eskuetan orekatzeko gai izateak edozer gauza egiteko gai garela sentiarazten digu.
Maila anitzeko klaseak izango dira, pertsona bakoitzari egokituak, zure bizitzan inoiz pinua egin baduzu edo ez. Hori bai, izerdi pixka bat botatzeko prest egon behar zara…
Irakaslea: Maialen.
BALEA IRAKASLEAK
Kaixo! Aitor eta Maialen gara, Balearen atzean dauden pertsonak!
2017an atzerrian bizi ginela, gure kabuz akroyoga praktikatzen hasi ginen. Hasieran aktibitate dibertigarri bat elkarrekin egiteko moduan egiten genuen. Gure egongelan bertan hasi ginen, interneten ikusten genituen poseen argazkiak nola egin deszifratzen saiatuz, horietara ahal genuen bezala iritsiz… Hilabete batzuk beranduago Euskal Herrira bueltatu ginen eta klase eta tailerretara joaten hasi ginen, hauek hilabeteak ideiarik ere ez izan gabe praktikatzen generamatzan gauzen atzean zegoen teknika ulertzen lagundu ziguten. Eta a ze garrantzitsua den teknika eta ze erraza egiten den norbaitek azaltzen dizunean!
2019an akroyoga irakasle moduan formatzea erabaki genuen, praktikan hasi nahi duten pertsonei lagundu ahal izateko. Ordutik klase erregularrak, tailerrak eta erretiroak ematen ibiltzen gara aukera dugun oro.
Namaste, Nire izena Valle da, eta Gasteizkoa naizen arren, urte asko daramatzat herriko bizitzaz gozatzen. Yoga une zehatzean iritsi zitzaidan, eta nire bizi-filosofia bihurtzen joan da. Tresna zoragarri hau gure gorputzarekiko maitasunetik eta errespetutik partekatu eta irakasten dut. Pertsona bakoitzari egokitutako praktika bat, bere egoera fisiko edo emozionala edozein dela ere, praktikaren onurak beti gozatu eta sentitu ahal izango dituzu zure egunerokotasunean, esterillaren barruan eta kanpoan.
Hauek dira urteetan zehar egin ditudan formakuntzak: Mahashakti Eskolako Hatha yoga integrala, Yoga Prenatal, eta Haur Yoga. Shiva&Shakti Eskolako Yinyoga. Yoga Aéreo.org-ren Aireko Yoga. Eta Profesionaltasun Ziurtagiria (Nafarroa).
Ikastaro honetan vinyasa yoga, yoga errestauratiboa/yin eta yoga leuna (+65) emango ditut Balean.
Duela urte batzuk hazkunde pertsonalaren ikuspegitik yogaren praktikan murgildu nintzen. 2018an horretan sakontzeko Mahashakti Eskolan Yoga Integraleko prestakuntza egiteko erabakia hartu nuen. Gaur egun bizitzarako yogaren ikasle izanik, praktika honek ematen didan guztia partekatzeko pribilegioz sentitzen naiz.
Geroztik, umeei eta haien familiei Gasteizko gizarte-etxeetan hezkidetza emozionalean lagundu diet. Gaur egun Izarrako ikastolan yoga eskolak ematen ditut ingelesez, baita Zerulur-en txikientzako yoga eskolak, eta helduentzako aireko yoga eskolak ere ematen ditut. Hatha yoga eskolak ere partekatu ditut Arteria zentroan, eta gaur egun Gasteizko Creciendo zentroan eta Balea Akroyoga ta Mugimenduan.
Sandra naiz. Bilbon jaio nintzen 1983an. Ingeniari informatiko (ohia), aikidoka, acroyogui, Shiatsu terapeuta praktikantea, bizitzazalea…
Akroyoga aurkitu nuenean, nire sinesmenak eta beldurrak gainditzen irakatsi zidan, ezetz esaten eta behar dudana eskatzen ikasi nuen, nire gorputzarekin modu berrietan konektatzen, sinestezinak iruditzen zitzaizkidanak. Thailandiako masajea ere aurkitu nuen, apaltasunez eta esker onez lan egiten irakatsi zidana, eta burua eta bihotza azkenik konektatu ahal izan nituen leku batera eraman ninduena.
Akroyogari dagokionez, Acroyoga Montrealeko Teacher Trainingean (1. eta 2. mailak) eta Acroyoga for Social Inclusion Training-en (Bartzelona) trebatu naiz.
Balean akroyoga klaseak ematen egongo naiz eta ikasturtean zehar tailer bat edo beste ere emango ditut!
Kaixo! Yoga praktikara une egokian iritsi nintzen, duela 10 urte ezagutu nuen arren, ikastetxeko estresari eta Mexiko Hiriko kaosari esker (bertan jaio nintzen). Urte batzuk geroago, praktikarekin topo egin nuen berriro, leku paradisiakoenetako batera bizitzera joan nintzenean (Quintana Roo). Oraingoan, beste irakasle handi batek, kundalini yoga zer den erakutsi zidan, nire egunen parte izaten jarraitzen duena arnasketa eta bisualitate ariketen eran.
Iaz, nire bizitza aldatu zuen gertaera bati esker, Mexiko Hirira itzuli nintzen, eta han Yogako estudio batean “secret room yoga” lan egin nuen, behar nuen bakea eta ikuspegia itzultzeko. Han diziplinaz eta maitasun handiz praktikatzeko zortea izan nuen (egunero), niretzat oso garrantzitsuak diren maisuak ezagutzeko eta 22 estilo ezberdin ezagutzeko. Azkenean, yogarekin denok leku berera (gure leku sakratura) goazela erakutsi zidaten.
Hor erabaki nuen hatha yogan irakasle bihurtzea, eta nire irakasleek egunero-egunero eskeintzen zidaten ezagutza bakoitzak nire jakin-mina eta praktikarekiko maitasuna areagotzen zituen.
Laster elkar ezagutu ahal izatea eta elkarrekin orainaz gozatzea espero dut!
Namaste
Mugimendu disziplinekin 9 urte nituela hasi nintzen. 16 urte bete arte, Gasteizko Jose Uruñuela Dantza Kontserbatorioan balleta egin nuen. Honek orain praktikatzen ditudan diziplinetan lagungarri diren gorputz-diziplina eta-kontzientzia ematen zidan, baina nire gorputzak beti mugimendu gehiago, akrobazia gehiago eskatu izan dit. Txikitan, paseatzera ateratzen ginenean, ez nintzen inoiz oinez joaten, baizik eta kaleetan zehar alboko gurpilak edo txiribueltak eginez joaten nintzen. Pixkanaka-pixkanaka, hainbat diziplinatan hezi eta trebatu naiz (yoga, akroyoga, movement flow, masaje tailandiarra…) eta beste batzuk nire kabuz praktikatzen, hala nola akrobaziak, pole dance, oihalak eta bertikalak.
Orain, BALEAn, gure akroyoga eta mugimendu zentro berrian, diziplina hauek ematen ditut, pertsona gehiagori mugimenduan beren pasioa aurkitzen laguntzeko itxaropenarekin.
